97 oc 6 Car amicos interlinguista: Io non vole enoiar vos e fatigar vos per un comparation detaliate inter mi littera del 3 de octobre e le responsas a illo. Vos qui vole exprimer un opinion ben fundate super nostre regrettabile controversia pote vos ipse interprender le ardue labor de facer iste comparation. Vos ipse pote trovar le varie equivocationes e lapsos ab le logica. Io suggere comparar, p. ex., mi prime e penultime paragraphos del 3 de octobre con le phrase de un responsa del misme data que ha essite traducite ab interlingua ad in le francese, le anglese, e le germano. Como commentario super mi littera, iste phrase es inapplicabile; illo imputa a me alique que io explicitemente _non_ ha dicite. Illo es diversionari e non cessa esser lo per esser traducite in tres altere linguas. Le traduction in espaniol per un altere membro del gruppo non salva le phrase, ni lo salvera le attendite traductiones ad in le portuguese e le finnese. Esque le standards de exactitude que le adversaria de Whorf applica in interpretar e responder a mi littera es un exemplo del standards applicate al textos de Whorf e de su commentatores pro arrivar al verdicto del racismo? Io vos rememora de qui ha initiate iste controversia, e como: con un plancto o admonition re le thema de un articulo republicate ab _Panorama_ in le sito WWW.interlingua.com. Secundo le sra. Burgi, illa "voleva prevenir le gruppo" contra le hypothese Sapir-Whorf, lo que vole dicer in nostre contexto que illa preveni nos interlinguistas contra le periculo que doctrinas racista gania circulation in le medios de interlingua. Un accusation o admonition re le racismo, ben que vage e sin scopo precisate, flotta ora in le atmosphera circa nos. In un littera del 3 de octobre le Professor Stan Mulaik osa nominar lo que sembla esser in circulation: "un correctessa politic que currentemente pervade le studios liberal in universitates". E io osa ora continuar: On debe esser caute con certe themas pro non incurrer suspicion de incorrectessa politic, p. ex. suspicion de esser racista o de esser un dupe de racistas. Le admonition ha essite lanceate in nostre atmosphera; le monitores de correctessa politic nos survelia; nos ha essite prevenite. In un message del 30 de septembre, p. ex., le sra. Burgi dice que le classification del linguas como membros del familia indo-european o de altere familias non es bon; illo non es bon proque "le motivationes pro facer iste classification non esseva bon, ma in un spirito raciste". Alora, classificationes, como doctrinas, non es personas e non pote ipse haber motivationes. Accusationes de mal motivationes--de racismo o de un spirito racista--debe applicar se a personas, anque si iste personas non sia clarmente nominate. Accusationes vage e con scopo imprecise ha essite lanceate a flottar in le atmosphera. (A proposito de linguas indo-european, io non resiste al temptation de citar un phrase del sra. Burgi: "William Jones face le discoperta del Sanscrit in 1784.") Un altere puncto: le validitate o utilitate de un doctrina o classification depende de su contento objective e non del conjecturate motivationes de su autores o usatores. Il es ben possibile que un hypothese valide sia annunciate per un persona moralmente despicabile pro rationes despicabile e que un hypothese erronee sia annunciate per un persona moralmente nobile con le intentiones le plus scientific. Un persona que le sra. Burgi in facto calumnia per nomine es le sr. Benjamin Lee Whorf. Uno o duo del responditores a mi littera ha suggerite que on debe facer le pace per trovar un via medie inter le duo lateres de nostre controversia. Ma io demanda: inter calumnias injustificate e respecto debite, inter injustitia e justitia, esque le via medie es le moralmente correcte? Io repete: mi thema ha essite calumnias e accusationes injustificate e admonitiones presumptuose, non le hypothese Sapir-Whorf. Super illo io ha exprimite mi opinion solo brevemente in mi littera anterior. Quicunque volerea saper plus de iste hypothese e judicar lo pro se mesme pote leger le fontes indicate in mi littera, specialmente le scriptos de Whorf mesme e le articulos e discussiones redactate per Harry Hoijer. Steven Pinker e Michael Devitt e Kim Sterelny, cuje obras io ha anque mentionate, face judicamentos adverse al hypothese S-W; ma iste autores da bon exemplos de argumentation sobrie inter le frontieras de decorum scientific. Optime salutes de Leland Yeager