Steve, Ben venite a interlng. Io es un vetere interlinguano. Io discoperiva interlingua in Novas de Scientia (le septimanal jornal) in circa 1953. In 1961 io laborava in Nove York e visitava frequentemente Dr. Alexander Gode a su officina a 80 est 11me strata. Post sex menses io retornava a Salt Lake Citate, ubi io habeva mi casa, e redigeva un parve septimanal in interlingua, nominate "Le Foro", dedicate a discuter questiones interlinguistic. Post maritar me e reciper mi Ph.D. in le psychologia, io deveniva minus occupate con interlingua, usque circa 1975 quando io solmente legeva le periodicos in interlingua, non correspondente con alicuno. Assi io non sapeva multo super interlingua usque in 1995 quando io visitava le gruppo de novas sci.lang in le interrete, e videva un message per Kjell Rhenstrom scribite in interlingua. Io decideva a rejunger le mundo de interlinguanos, e per bon fortuna pro nos omnes, plure septimanas post isto, Frank Pfaff videva mi messages a sci.lang in interlingua, que le interesseva in interlingua anque. Ille alora provideva iste servitor de lista "interlng", e le resto es historia... Io es ora un professor del psychologia al Institute Georgia de Technologia, ubi io insenia le statistica e le theoria del personalitate a studentes. Io ha un major interesse in le philosophia del scientia e del causalitate. Io es ben legite in le obras de Kant e Wittgenstein--in anglese solmente. Ben que io sape un poco de germano (bastante pro leger le contos de Til Eulenspiegel), io non pote leger ben le germano technic. Io pote leger (mais non pote parlar) le francese e le espaniol--un poco. Si vos non ancora ha lo, obteni le texto "Interlingua Today" per F. P. Gopsill. Su texto face interlingua un lingua vivente. Alora, scribe frequentemente super multe topicos in interlng, e vos eventualmente va devenir alquanto fluente in illo. Stan Mulaik