Ensjo, Lo que vos dice super le grandessa de Brazil in que on audi le portugese in tote partes es anque ver del Statos Unite. Nos non senti le necessitate de apprender altere linguas proque le anglese es sufficiente. E io suppone que in Mexico, America Central, e altere partes de Sud America, le espaniol es sufficiente trans un grande area. Io incontra plus linguas estranie in mi vita quotidien ora quando io compra cosas al quincalieria, ubi le pachettos contine instructiones in anglese, francese, e espaniol a causa de NAFTA (Nord American Libere Commercio Alliata). A alterar le subjecto, io debe relatar a vos como incostose le gasolina es in Atlanta al hora actual. Io compra le grado intermedie del gasolina. Hodie illo costa solmente $.85-.90 per gallon US. Proque un gallon US es 3,785 litres isto es equivalente a .85/3,785 = $.22 per litre. Io crede que in $ de 1970 isto es quasi como $.25 per gallon, que esseva inexpensive mesmo in ille annos. On dice que le ration pro isto es proque il ha un superabundantia de oleo ora producite per le paises oleoproducente. De plus Atlanta es locate super un major oleoducto inter Nove Orleans e Nove York e Boston. Assi le costos del transportation es minus. (Un major parte del costo del gasolina es ancora le taxas: circa $.12 per gallon). Io non sape quanto longe nos va continuar a haber iste bon fortuna. (Io debe viagiar cata die 23 milas (37 km) a mi officina a Georgia Tech. Le grande parte del viage es per superstrata; assi le gasolina es un expenso importante pro me.) Stan Mulaik