Iste nocte passate un serie de tempestas esseva lassate a assaltar le statos del sud est del Statos Unite con tornados. In le Stato de Alabama al west de Georgia, 25 personas esseva occidite. In le stato de Georgia solmente 9 morte individuos ha resultate del tempestas. Totevia il ha possibilemente plure milles de casas que ha essite o damnate o demolite per le tornados que passava per le region metropolitan circa Atlanta. Io ora cognosce definitemente que le previe apartamento de mi filio Robert e su sposa Lori esseva damnate severemente per le tornado que assaltava lor vicinio. Duo collegas martitate in mi departamento a Georgia Tech ha reportate que tres arbos ha cadite super lor casa. Milles de vitas es affected per le tornados. In un districto commercial presso mi urbo de Marietta un barberia esseva demolite per un tornado. Nulle vitas es perdite. Mais le affair es destruite, al minus temporarimente. Usque le barberia es reconstructe, le clientas del barberos va vader a altere barberos a altere locos. Altere commercios ha solmente perdite le distribution del electricitate a lor affaires usque le lineas electric es restaurate. Mais illes perde le moneta que haberea venite a lor affaires. Secundo le imagines del television, il ha numerose casas demolite per le tornados. Grande casas, parve casas, nove casas, ancian casas. Del helicopteros on observa le casas sin tectos, lor muros ancora erecte. In altere casos e le tectos e le muros es demolite e il ha un grande pila de ligno. A vices solmente un fundation remane, le resto del casa evanescite in le vento. Ora le fortias del reconstruction commencia a mover in le areas destruite. Le assecurantia va adjutar multe gentes a reconstruer lor casas. Le governamentos del stato e federal va provider prestos a minor costo. Le gentes va reconstruer lor casas e commercios destruite, potesser lentemente. Stan Mulaik