Tunisia
Si vos vade verso Tunisia, vos trovara un parve village nominate Sidi Bu Said. Le village es al nord del pais e le lumine que lo bania in primavera es incerte sed belle. Sidi Bu Said es un mirage. Su casas blanc, su fenestras blau, su apparentia andalusi es como un sonio. Tunisia non es Andalucia. Le homines arabe es seriose, troppo seriose, e illes ha construite un societate ubi le differentia inter le sexos pote explicar multe cosas. Le feminas juvene es belle, studiose. Io diceva a Camino, mi amica: lor unic sperantia es lor feminas.
Patricia Highsmith affirmava lo a Hammamet. Qui faceva que? Le deserto faceva le arabes o le arabes faceva le deserto?
E io dice isto a Pamplona, postea nostre retorno ab Douz, Sidi Bu Said, Hammamet, Kairouan e Gabes: potera le feminas desfacer le deserto que las cinge?
Illo es curiose. In espaniol nos ha un parola proveninte del arabe pro dar un bon responsa: ojalá (vole lo Deo).
Vole lo Deo, si ille o illa existe, vole lo le destino, e vole lo nos, le multo ric statos occidental.
Marihuana
Statos ric, sed statos. Hic, in Espania, vos pote posseder alicun gram de marihuana, cocaina, heroina o qualcunque altere droga, e si vos pote demonstrar que illo es pro vostre proprie cosumo, vos restara libere. Ma le Stato se inquietara si pensa que le quantitate es troppo grande.
Antea un septimana comenciava hic le judicio contra un juvene accusate de plantar abundante cannabis in un terreno de su patre, in le verde valle de Baztan. Le strategia de su advocato es demonstrar que le marihuana esseva pro le consumo proprie del cultivator e de su amicos.
Absurde. Non le strategia del advocato, naturalmente, sed le obstination del Stato, que per medio de Tabacalera ha colligite quantitates fabulose de moneta vendinte tabaco.
Drogas, morte e legalisation
Quando le Partito Socialista espaniol obteniva le victoria in le electiones de 1982, Espania esseva in le melior situtation possibile pro legalisar le cannabis. Multe personas consumeva lo in lor casas, in le bares, in le concertos de rock, in le restaurantes e in le strata. E mesmo in le mitines de le juvenes socialista... Le Governamento de Felipe González oblidava tosto su promissas in re le drogas, como illo oblidava su pacifismo o su lucta in favor del personas marginate. Nunc -postea 14 annos de Partito Socialista e con un governamento conservative- nos ha un terribile experientia de morte causate pro le mal uso del drogas e, super toto, pro le persecution de lor commercio.
Amicos: Qual es vostre opinion? Qual es le situation in re le drogas in vostre paises?
Ignacio Martínez Recari