Salute! Io ha pensate un poco super duo problemas: - como facer le vender e le pagar de nostre libros in interlingua in un maniera simple - como pagar le costos al arrangiator a nostre incontros national e international. Pote nos usar cartas e Internet? Io ha pensate super le situation in mi pais, Svedia. Mi parentes, nascite circa 1900, ha quando possibile pagate contante directemente. Si illes esseva facturate illes ha visitate le venditor e pagate contante e a vices pagate in le officina postal per giro postal. Mi patre o matre nunquam habeva un giro postal private. Naturalmente illes non etiam habeva cartas bancari de alcun sorta. In mi generation , nascite circa 1930, nos plus sovente ha pagate nostre facturas per giro postal private e un minor parte per giro bancari. Le abonamento de giro postal esseva gratis e etiam le transportation de tal messages postal. "Postverket" (le posta svedese) ha habite su profito necessari per le interesse del capital in su manos durante le transportation. In nostre dies un grande parte del facturas private es pagate per giro postal ma nunc le Postverket carga su abonatos con un summa annual de SEK 120 (USD 15). Le fluxo de monetas in le manos del posta ha multo decrescite. Cartas bancari pro fornir le cliente con monetas ex automatos esseva popular pro un tempore ma nunc le bancas non ama los proque le manear de monetas (cash) es costose. Cartas pro pagamento in catenas de botecas e catenas de vender benzina (Shell, BP, etc) es multo commun. Cartas pro pagamento universal con/sin credito es etiam multo commun (Mastercard, Visa, etc) Le situation hodie es que le bancas e le officinas del posta non vole servir su clientes in cassas. Troppo costose - a servir un cliente costa SEK 14 (USD 1.75). Manear monetas (cash) es etiam multo costose pro bancas e botecas. In plus le risco de robamento es a adder. Nunc alcun bancas ha introducite "cash cards" e illos nunc se diffunde in Svedia. Il es un carta con "monetas virtual" con que on pote pagar in botecas pro parve cosas. Le proprietario del carta pote cargar le cashcard in automatos al bancas e altere locos de su conto in le banca. Ille etiam ha un parve apparato que pote demonstrar le summa disponibile al carta e etiam le ultime transactiones facite. Le bancas face propaganda pro iste cartas. Ancora le systema non es establite bastantemente. Comprar merces per Internet? Io sape que le gentes in SUA usa lor cartas de typo Visa, Mastercard sin timor pro shopping. Io ipse ha usate mi carta pro subscriber a jornales international e comprar libros (in Amazon). In Svedia on es ancora plus caute e desira attender le systema que permitte plus grande securitate que es in developpamento del major fornitores del cartas (Mastercard, Visa e alteres) Io ha scribite iste parve rhapsodia historic quando io ha pensate al possibilitates a establir un systema que permitterea vender nostre libros in interlingua per Internet. Il se non solmente tracta de un cosa technic - sed etiam un cosa del psychologia a acceptar nove systemas. Io me imagina que le situation es differente in varie paises. Sed io non dubita que le vender per Internet es multo desirabile pro nostre movimento e que on debe tentar a startar un tal servicio. Le situation practic e psychologic in tu pais? Amicalmente Jan -- Jan Årmann/Jan Armann Generalsgatan 12 E; S-903 36 UMEÅ/UMEA, Sverige (Sweden) Tel & Fax +46 (0)90771525; e-mail: [log in to unmask]; [log in to unmask]; [log in to unmask]; ICQ - UIN nr:785745; http://www.algonet.se/~armann