Le si-appellate mini-statos ha experientiate un enorme crescita e interesse con le introduction de Internet. Certe statos es real e vole liberar se del stato national, del qual illo es actualmente un parte. Alteres es purmente phantasia e (bon) humor, sovente establite per personas intelligente con un enorme sapientia - e le desiro de combinar un ardente interesse con le libertate de facer exactemente como on lo vole. Un exemplo de isto es Corvinia. Le principato es identic con le appartamento del "principe", e tote le familia possede postos importante inter le nobiles. Corvinia es vermente active e attrahe le interesse de multissime personas ab tote le mundo, proque le idea es si detaliatemente developpate. Le interessante pro nos es que un del linguas official es ... interlingua. Visita mesme www.corvinia.org (le majoritate del contento es - ancora - in anglese, nam le principe ha durante su juventute habitate con su parentes danese in Hong Kong), o consulta directemente www.corvinia.org/minprop/microw/corvin-i.html pro le presentation in interlingua. Le principe, Peter Ravn Rasmussen (qui - in parentheses - es le programmator del sito domestic de mi jornal, Berlingske Tidende - visita lo a www.berlingske.dk, mesmo si illo es solmente in danese), ora mesme studia intensivemente interlingua, e obras ab su mano es a expectar. Ma ille anque gere un multo ben visitate sito historic, trovate al mesme adresse como Corvinia. Le exposition de interlingua es assi remarcabile, e le sito de Corvinia va poco a poco extender su uso del lingua. Isto significa que un assatis grande gruppo de personas intelligente habera contacto con interlingua, e le prime multe reactiones ja ha venite. Face mesme le experientia. Bon viage a Corvinia! Con mi optime salutes Thomas Breinstrup