>
>[ Pfaff ]
>Voler reducer le problemas actual del presidente american a un neurosis
>puritanic del publico american es assatis risibile, in mi opinion. Le
>defenditores de Clinton essaya semper facer iste argumento.
>
Si vos ha pensate que io voleva facer considerationes troppo simples super le problemas de Clinton, io me dole de illo. Isto non esseva mi intention. Forsan io ipse es troppo simple e non comprende ben!

Ma, per favor, relege le texto que io scriveba. Assi vos potera trovar phrases como "si ille (Clinton) vole facer sexo con un, duo o cento feminas (e illas anque lo vole, obviemente), ille debe memorar que multe americanos non accepta iste practicas e ille debe usar su voluntate e su intelligentia" o "ille ES RESPONSABILE, proque ille HA VOLUNTATE e, secundo le membros nord-american de Interlng, INTELLIGENTIA".

Io non sape si Clinton ha commitite abusso de poter in iste caso (voleva Monica Lewinsky haber relationes sexual con ille o non? Illo es determinante. Hic, in Espania, totes pensa que si, que illa voleva). Ma io es convincite: iste non es le pejor cosa que ha facite Clinton. Ab mi perspectiva, su attaccos belic coincidinte con omne mention super le allegre vita de su penis son multo pejor.

In re le monarchia elective, non vos altera. Io ha usate iste expression solmente pro remarcar que illo es estranie pro nos, le europeos qui vive in systemas parlamentari. Le presidentialismo american non me place, isto es ver, sed illo es melior que multe altere systemas. De plus, nos ha in Espania un rege non elective (sed assatis "decorative") e, si io poteva decider lo, io annullarea su contracto constitutional juste deman. Ma io non pote. Nos deberea facer un inmense cambio constitutional pro illo!

E proque me interessa tanto le problemas de Clinton? Ben, il ha un cosa que io nunquam comprende e haber un bon explication me satisfacerea multo. Secundo le informes de Amnesty International, le Statos Unite de America, como stato, committe cata anno assatis de violationes del derectos human. Quando originara iste realitate le medietate de criticas que le 'hasardose' comportamento del allegre penis presidential?

Io non vole, in necun caso, poner Espania como exemplo. Nostre systema deberea respectar multo plus le derectos human. Ma le ver es que le ultime e terribile scandalo hic ha essite le imprisionamento de importante socialistas (inter illos le exministro Jose Barrionuevo) a causa de lor participation in le guerra immunde contra ETA (gruppo terrorista que, non lo oblida, assasina, assasina e assasina), e non le comportamento sexual de alcun persona public. Quando alicun ha tentate crear un scandalo sexual, ille ha facite fiasco. Per exemplo: Pedro J. Ramirez, le director de "El Mundo" -un ben cognoscite jornal anti Partito Socialista- esseva filmate a su casa faciente multo heterodoxe practicas sexual con un femina que non esseva su sposa (ille vestiva, e non illa, le corset rubie). Ille mentiva in le principio -"oh, no, no, le video ha essite manipulate"- malgrado ille es un del plus importante jornalistas de Espania. E postea? Quasi totes diceva que su corsets e su relationes era un problema de ille e de su sposa, e que le filmation era le unic cosa evidentemente illicite in tote le affaire. Mesmo io, qui detesta le jornalismo pseudo-progressive de Ramirez, pensa assi.