Kjell, Io non desira discuter rationes negative contra creder le fide baha'i. Generalmente a aquelle tempore io habeva arrivate al recognition que mi credos esseva alargate per mi education, e que le fide baha'i como altere religiones institutionalizate, habeva structuras authoritari que in multe respectos es similar in lor function como aquellos in le ecclesia catholic. Il habeva certe doctrinas que io non poteva creder: p.e. le idea que le homine representa un distincte mais parallel regno al latere del regno de animales. Le homine non es descendite del animales. Como le filio de biologos con un diploma in biologia, aquesto esseva difficile pro me a acceptar in tanto que io crede le doctrina del evolution a causa del evidentia scientific. Io opina que mi incontro con le buddhistas zen, qui habeva necun "doctrinas" habeva un forte influentia super me. Le objecto del religion non pote continer se in "doctrinas". De plus le theologia de Paul Tillich, le theologo protestante, inseniava que le Deo non es un Esser, un cosa inter altere cosas, mais le fonte de Esser: trans tote comprehension. E su interpretation del crucifixion esseva que aquesto es un criteria contra que le finite pretensiones de cosas finite a esser nostre preoccupation ultime es comparate: proque il ha un Deo qui se sacrifica pro vos in loco de requirer que vos vos sacrifica pro le deo o cosa finite--como le ecclesia, le communismo, etc.. Le vehiculo finite non es nostre preoccupation ultime, mais pare per lo, e tote le cosas pote servir in aqueste capacitate de revelar a nos le objecto de nostre preoccupation ultime. Totevia, il habeva in le fide baha'i un forte elemento del mysticismo, que io opina ha su origines in le traditiones mystic infra le shiite e sufi mysticos de iran. Le mysticismo historicamente ha opponite le doctrinas proque su experientia personal del Deo non poteva formular se in parolas. Baha'u'llah ha scribite alcun belle scripturas mystic, que es partes del fide baha'i que io ancora admira. Ille esseva un ver mystico. Mysticamente, Stan Mulaik