SIBILAR IN LE TENEBRAS Durante que le guerra continua in Serbia, como esque jornales in Europa e le Proxime Oriente ha reagite al bombardamento del OTAN? per Alexander Chancellor, London Italia deveniva le prime pais del Organisation del Tractato Nordatlantic a poner in dubita le solidaritate del alliantia militari contra Serbia, quando le prime ministro Massimo D'Alema demandava le cessation del attaccos aeree e un retornar al negotiationes. "Italia se relente: tension in OTAN" era venerdi le titulo major del La Stampa de Turino, que in un editorial de prime pagina condemnava le prime ministro pro voler retirar se tanto rapidemente. Le "dignitate" de Italia e su "rolo international" exige "comportamento plus seriose", illo diceva. "Etiam le cambios walzeresc e phrenetic al qual, infelicemente, le diplomatia italian ha accustumate nostre alliatos e adversarios in le passato durava plus que un sol die." "In un effortio a salvar le unitate de su coalition e prevenir un crise governamental, Massimo D'Alemo ha se detachate de su alliatos international," ha reportate La Repubblica de Roma ex Berlin, ubi leaderes europee era assemblate, e illo diceva que isto creava "un incidente major" al summito. Le assertion jovedi de sr D'Alema , que "le prime operation del OTAN ha inducite le Serbos suspender lor offensiva militari contra le population civil de Kosovo", era toto discreditate per reportos de jornalistas sur le loco del brutalitate crescite de Serbos contra le Kosovares albanian. Un reporto de Pristina in The Daily Telegraph de London describeva le removar ex su domo del prime advocato legal de derectos human de Kosovo, Bayram Kelmendi e su filio Kastriot, a que on diceva a basiar su infantes pro le ultime vice, proque ille non jammais vaderea vider les de nove. Quanto al decision del presidente Slobodan Milosevic de expeller jornalistas e equippas televisori del West ex le region, La Repubblica notava que ni Hitler ni Saddam Hussein habeva facite isto . In Francia, Libe'ration diceva in un editorial de venerdi que le attaccos de rocchetta, lontan de espaventar "le grande mundator ethnic del Balkanos", habeva facite le parer quasi como habente le juste causa. On non va salvar le Kosovares, le editorial addeva: "Tosto o tarde Milosevic va retornar al tabula del negotiationes, ma isto essera sin dubita solo pro effectuar le partition de Kosovo." Anque Le Figaro prevideva le partition de Kosovo como un resultato undesirate del guerra, le albanianos prendente le montania inhospitabile e le Serbos le plana fertile, e illo blasmava Europa pro permitter Washington arrangiar tote cosas, sin prender responsibilitate pro su proprie securitate. Le historia monstra que campanias militar es successose solo si on defini lor scopos in avantia, diceva Le Figaro in comparar Bill Clinton a "un parve puero qui sibila in le tenebras pro reassecurar se." In Espania, El Mundo demandava un solution politic, dicente que si le bombardamento continue longe, le alliantia va devenir crescentemente dividite. In Britannia, The Daily Telegraph proponeva que on face le independentia de Kosovo a "un scopo declarate del politica - post tres annos, si sr Milosevic accede a Rambouillet, plus tosto si ille non lo face"; The Independent diceva que le Nationes Unite jam se ha accordate con le objectivo del guerra - proteger le derectos human del Kosovares albanian - e que le OTAN debe non reculer se de un longe campania pro attinger isto; e The Times urgeva un le expedition de un presto ex le Fundo International Monetari a Russia pro mollificar celle pais. Malgrado sentimentos de solidaritate con le majoritate albanian muslim de Kosovo, a jovedi le jornales arabe era generalmente lugubre e apprehensive concernante le offensiva del OTAN. Illos timeva que isto poterea damnificar le autoritate del Nationes Unite e ducer a un resumption del Guerra Frigide, durante que illo beneficarea Saddam Hussein e debilitarea le OTAN per incitar hostilitate inter Grecia e Turchia. In le jornal quotidian pan-arabe al-Hayat, Abdelwahhab Badrakkhan scribeva que le Statos Unite, per arrogar a se le derecto de decider su le usar de fortia militari, habeva "delegitimisate" effectivemente le Nationes Unite. Ille advocava un nove accordo international del typo que reimplaciava le Liga de Nationes per le Nationes Unite, proque il era inacceptabile que le NU devenirea "mermente un edificio a ubi gentes va pro querelar o participar in debattas byzantin sur textos que, como tote le mundo sape, le grande poteres essera le primos a tractar con contempto." In le prime quotidiano saudi Asharq al-Awsat, Huda Husseini diceva que bombardamento monstra le propensitate crescente del administration Clinton pro "solutiones militari como substituto pro planos considerate a imponer le pace e proteger gentes de massacros." Le scriptor exprimeva inquietude sur le precedente illo poneva pro interventiones militari per le OTAN in le conflicto interne de qualcunque stato. "Si le tensiones cresce futurmente inter Washington e Beijing, que va prevenir le prime a levar le thema Tibet e poner le possibilitate de intervention la," illa scribeva. "E, si le scopo del intervention es proteger minoritates oppresse, proque non intervene le OTAN in Turchia, cuje historia re derectos human verso le Kurdos es tanto mal que possibile?" Selectivitate in approchar themas de derectos human e autodetermination es un ancian tracto del americanos, diceva sra Husseini, addente que "su resolution in Kosovo se tracta forsan plustosto de supportar le credibilitate del OTAN durante le approximar de su cinquantesime anniversario, e de assecurar que le leadership de Washington del alliantia non pare debile." Nonobstante, illa continueva, "le attacco aeree pote non solmente provocar un retaliation serbe contra le OTAN, ma anque precipitar un conflicto ethnic in Macedonia, que ha un grande majoritate ethnic albanian," e un explosion balkan debilitarea severemente le OTAN. Le evaluation del situation le plus allegre veni del titulo major a jovedi del quotidiano albanian eRilindja Demokratikei. "Le OTAN face le pace in le Balkanos," illo diceva. Fonte: Slate (magazina inlinea) reproducite in The Globe and Mail de Toronto 30 martio 1999.