------------- HALICARNASSOS ------------- Estimate Seniores, Pashas e Efendis! In 1998 septembre io e mi marita Brita-Lisa habeva un vacation in Marmaris, Turchia. Marmaris es le prime centro touristic de Turchia. Su ambiente, le provincia de Karia, es multo belle e un del cunas del cultura hellenic. Marmaris ha uno del plus grande portos yacht (yat limani in turc) del Levante - le Mediterraneo del est. Illo ha etiam un fortalessa, que Süleiman Magnific (le turcos le nomina Süleiman le Legislator), le plus grande del sultanes in le historia de Turchia, usava como base quando ille captivava Rhodos ex le cavalleros de cruce in 1522. Un pastor svedese ha scripte un libro excellente super le assedio de Rhodos. Le nomine de libro es "Riddarna pċ Rhodos" (Le caballeros in Rhodos). Iste libro se basa super le chronica official del Ordine de Sancte Johannes. In le porto de Marmaris era durante le duo septimanas, quando nos remaneva la, un nave multo interessante. Illo era un parve e multo pictoresc nave a vapor britannic, que habeva participate al evacuation de Dunkerque in 1940, secundo le latta de laton sur su camino. Le nave serviva nunc como un yacht. Io crede que iste parola anglese es pronunciate in anglese - incredibilemente - como "yot". Forsan le interlinguanistas nordic e german deberea lo pronunciar como "yaht". Al altere flanco del peninsula de Marmaris es le Golfo de Gökova, que Pierre Cousteau ha appallate como "le plus belle golfo del mundo". Sur le ripa nordic del Golf de Gökova es le citate de Bodrum, le ancian Halicarnassos, le loco de nascentia (485 a.Chr.) de Herodotos, "le patre de historia". On trova in Halicarnassos le ruinas de mausoleo del - MAUSOLLOS ipse. Prince Mausollos era maritate con su soror Artemisia, le regina de Karia. Quando Mausollos moriva, su soror qui su fratre multo amava, lassava edificar un gigantesc monumento - le mausoleo - pro le memoria del fratre. Isto mausoleo era uno del septe miraculos de antique. Un altere edificio interessante in Bodrum es le fortalessa de cavalleros de cruce. Isto fortalessa magnific era construite como un fortalessa preponite pro le grande fortalessa de Rhodos. Postea Süleiman Magnific habeva captivate le fortalessa principal de Rhodos, le fortalessa de Bodrum capitulava sin battalia. Le cavalleros de Rhodos, Bodrum e altere fortalessas in le vicinitate cambiava a Malta, ubi illes deveniva un enoio al navigation turc durante seculos, usque Napoleon Bonaparte cessava le Ordine del St. Johannes in 1798. Proque le fortalessa de Bodrum era lassate intacte, illo es continuantemente in un bon condition. Le turcos ha lo recentemente restaurate e llo ha obtenite premios international pro un restauration exemplar. Le fortalessa es restaurate como un fortalessa de cruciatos. Turc es solmente un minaret. Un cuirassato francese demoliva le minaret con un granata precise in 1915, durante le grande battalia de Gallipoli (Gelibolu - Çanakkale in turc) e illo era reconstruite solmente recentemente. Il remane quasi 200 original armas heraldic de familias nobile francese, anglese et alii sur le muros del forta- lessa. Multo impressive es le sala del cavalleros anglese. Il ha armas e harneses medieval, ancian armas heraldic, bandieras etc. Medieval musica anglese sona. Un multo juvene e extrememente belle puella qui appareva como un dama de honor del corte de Anglaterra medieval. Illa serviva vino rubie e blanc. Le turcos habeva obviemente cercate pro un puella in Bodrum qui le plus semblava un anglese dama nobile medieval. Il era un maxime dose del nostalgia romantic del mundo medieval de cavalleros. Le guida turc diceva que le bon condition del fortalessa es explicate per le facto que illo nunquam era usate in guerra durante le epocha de fortalessas proque in iste epocha le frontiera del sud de Turchia passava in le medie de Africa ... Le fortalessa habeva, naturalmente, etiam le camera de tortura equipate con instrumentos horribile. Un pauc inexpectate era le exhibition del arte erotic ancian. Le turcos, que son supponite esser bastante puritan, embarrassatemente rideva al iste picturas e sculpturas "obscen". Le viage ab basso del Golfo de Gökova e retro era facite con un hydroplano, facite in le Union Sovietic. Turchia ha multe hydroplanos in uso, i.a. in traffico inter Marmaris e Rhodos. Nos videva illos etiam in Grecia in 1991. Le prime vice nos viagiava con un hydroplano sovietic in Bulgaria in 1978 ab Nessebar (Burgas) a Varna. Alicun hydroplanos sovietic son in uso de armatores estonian, in traffico inter Tallinn e Helsinki. Le hydroplanos son multo rapide sed illos non pote tener su rapiditate in un mar grosse, qual nos habeva durante nostre viage retro ab Bodrum. Aqua veniva in le cabina in undas e le nave debeva quasi stoppar in intervallos, etiam proque illo comenciava batter violentemente contra le undas. On claudeva le hachette e le cabina semblava un incombrate, mal ventilate cabina de un aeroplano - o - un submarino. Io ponderava anque iste hydroplanos poterea esser un pauc periculose proque iste barcas son bastante vetule e le tension fatigante al grande planas soldate es enorme. Si un plana se rumperea, illo esserea un fin abrupte pro nos - un morte in un submarino ... He he, io sentiva alicun sentimentos claustrophobic ... Sed io nunquam ha audite de un accidente de isto typo e le technica sovietic de metallurgia e soldatura habeva bon reputation. Retro in basso del Golfo de Gökova un can "attaccava" nos e voleva morder nostre lacettos. Nos isto non permitteva sed quando nostre autobus lassava le porto le can curreva apud le autobus con longe corda in su bucca como illo haberea volite monstrar nos que illo habeva un corda multo plus remarcabile quam nostre lacettos miserabile. Le viagio super le montania al altere flanco del peninsula era etiam excitante. Retro in Marmaris nos diceva a revider a nostre guida de agentia de viagos turc "Agora", un homine multo agradabile, un senior del etate median.