Un typo con aspecto mendicante entra in un bar e demanda un bibita. Le servitor dice: -- No, absolutemente! Io non crede que tu pote pagar pro illo. -- Tu ha ration, io non ha moneta. Ma audi: Si io te monstrara un cosa que tu non ha jammais vidite antea, tu me dara un bibita? -- Solmente si lo que tu me monstrara es un ver phenomeno! -- Negotio facite! -- dice le typo, durante que ille introduce le manos in le tasca de su mantello e retira un hamster, que ille pone super le bar. Le hamster curre al longo del bar, descende per un tabouret, curre per le salon, ascende al piano, salta super le claviero e comencia a sonar musicas de Bach. E le hamster es multo bon! Le servitor dice: -- Tu ha ration. Io nunquam ha vidite alco assi antea. Ille hamster es de facto multo bon al piano. Le typo gania su bibita, que ille verte a un sol tracto. Ille demanda un altere dose. -- Moneta o altere miraculo, al contrario nulle bibita -- dice le servitor. Le typo tranquillemente introduce le mano in su mantello e retira un rana. Ille pone le rana super le bar e illo comencia a cantar. Le rana ha un voce meraviliose e un grande accordatura, un cantor excellente. Un estranio ab le altere extremitate del bar abborda le typo e le offere $300 pro le rana. -- Negotio facite! -- Ille prende le $300 e da le rana al estranio, qui exi del bar con illo. Le servitor dice al typo: -- Tu es alcun specie de idiota?! Tu ha vendite un rana cantante pro $300?! Illo debe valer milliones! Tu debe esser folle! -- Non exactemente -- dice le typo. -- Occurre que le hamster tamben es ventriloquo. --- Ensjo.