BURLA!

Car amicos!

Recentemente io debeva visitar Keszthely, un urbe micre e agradabile apud le famose laco hungare Balaton (le plus grande laco de Europa Central) de quasi 50-55 km-os de distantia de mi urbe Zalaegerszeg. Quando io cercava per mi auto le loco intra le urbe, al qual io debeva vader, io naturalmente examinava le subscriptiones sur le edificios pro poter orientar me. Io discoperiva un scription sur un templo .... IN INTERLINGUA! Isto es: "Ecclesia minor". Isto esseva plenmente in juste interlingua pro me comprensibile, mesmo con juste orthographia sur un templo, que esseva construite certemente ante 1951 (probabilemente in le epocha baroc). Como isto pote esser, si - secundo mi cognoscientias le interlingua esseva publicate solmente in 1951... Isto pote significar solmente, que interlingua existeva mesmo ja ante 1951...

:-)))) BURLA!

Naturalmente io sape, que isto es (intendite alora esser) in latino. Le assertion / supposition es naturalmente un burla, ma le conclusion es ver: interlingua existeva mesmo jam ante le 1940s-1950s, solmente on debeva retrovar, recolliger, rerediger lo.

Esque vos cognosce altere titulos (plen phrases, o coherente expressiones) sur edificios (vetule) le quales es (comprensibile) plenmente in juste "interlingua" (de IALA)? Io mesme trovava solmente un altere, isto in mi urbe sur le gymnasio construite in 1896 (ma isto es solmente un parola in juste interlingua: "ANNO", le altere parola "millenium" non plus es "juste interlingua", ma latino a causa del desinentia "-um").

Péter Kovács