Il pare que io habeva ration quando io prediceva que
le resistentia iraqi contra nostre occupation de lor
pais iva gradualmente crescer.  Le major parte de iste
resistentia veni de cinque fontes:

(1) Gruppos residual de membros del partito Baath e le
Fedayeen Sadam, un gruppo de guerreros juvene qui odia
specialmente le Statos Unite;

(2) Guerreros con ligamines a Al Qaeda;

(3) Musulmanes sunni qui time le repression per le
shiitas, le majoritate del population iraqi;

(4) Guerreros de altere paises, specialmente Iran; e

(5) Criminales commun liberate per Saddam Hussein un
pauco ante nostre invasion de su pais.

Le Statos Unite sperava que India, Pakistan, e
Portugal inviarea grande numeros de truppas.  Le
portugeses ha inviate solmente 120 agentes de lor
policia paramilitar, e functionarios de India e
Pakistan non vole inviar truppas a Iraq sin un mandato
del Nationes Unite.

Le Nationes Unite probabilemente essera multo
reluctante a participar in le pacification de Iraq
post perder multe prestigio a causa del contempto que
Bush monstrava a su processo de inspectiones.

Le poloneses nos appoia assatis enthusiasticamente
proque illes spera que eventualmente nos va dar multe
moneta a illes.  Il es ben possibile que con le
tempore illes va discoperir (como le Hmong durante
nostre guerra in Vietnam) que nostre governamento
federal pote esser tan duplicitose como le direction
de Microsoft.

Con multe reluctantia, Bush studia le possibilitates
de intervention statounitese pro pacificar Liberia e
su paises circumferente.  Ma nostre personal militar
es multo occupate in Iraq, e nos non ha le capacitate
de simile interventiones in ulle altere pais.

Nostre congresso comencia inquietar se.  Le responsa
de nostre administration es un postura de optimismo.
"Construer le democracia," dice le representantes de
Bush, "demanda tempore e effortio."

Si le resistentia del iraqis contra nos continua su
augmentation, forsan Bush discoperira que su
reelection devenira impossibile.  E iste resistentia
pare devenir de plus in plus organisate.

Bush e Blair nunc confronta le problema de responder a
accusationes que illes deliberatemente decipeva lor
paises respective in lor insistentia que armas iraqi
de destruction massive esseva un menacia imminente que
justificava le invasion angloamerican del pais.  Le
BBC mesmo ha accusate Blair de mendacitate deliberate.

Naturalmente il ha americanos qui ha facite simile
accusationes contra Bush.  Ma in iste momento illes
non attrahe multe attention, como illes qui accusava
Nixon de conducta criminal immediatemente post le
effraction de su "plumberos" in le edificio Watergate.

__________________________________
Do you Yahoo!?
SBC Yahoo! DSL - Now only $29.95 per month!
http://sbc.yahoo.com