Ben venite Ove! Iste gruppo es un via excellente pro practicar le
interlingua.

Con respecto al esperantistas, io opina que mi proprie attitudines es
similar a illos de Dr. Gode, qui esseva un amico del mie post io
commenciava corresponder con ille circa 1954. Dr. Gode refusava a
querelar con illes, ben que ille esseva preste a clarificar misconceptiones
disseminate per illes con respecto al interlingua. In su opinion lor
conceptiones del lingua auxiliar esseva tanto differente que le sue
que il habeva pauc base pro un discussion con illes.  Le esperantese
opina que le mundo debe esser unificate con un lingua, de facto, sin
un lingua le unification e pace es impossibile.  Dr. Gode faceva
emphase que per le historia il ha habite multe linguas auxiliar,
e in altere casos il habeva linguas que ha attingite un certe
predominantia in affaires international, sovente per le expansion
de un cultura, un religion  le conquesta militar, le commercio, le
scientia.  In tote iste casos il habeva fortias social impellente
le usage de un certe lingua foras su usual bordos. Si un lingua non
ha tal fortias favorante su expansion, illo non va expander.  Isto es
ver hodie.  Ille opinava que interlingua es ligate al civilization
occidental e le expansion de su cultura e linguas. Illo es un realitate
si o non illo es usate in un maniera practic pro expander le communicationes
inter populos participante in le civilization occidental. In altere
parolas, le Union Mundial pro Interlingua pote non exister, e le
phenomeno que es interlingua ancora existe in le linguas europee,
potesser attendente al arrivata de un altero a usar lo pro crear un
lingua auxiliar.  Io pote adder que personalmente io opina que le
anglese succede como le lingua auxiliar hodie proque del "interlingua"
in illo in addition al multe attractiones cultural que le cultura
anglese e american ha pro altere populos. Illo contine un grande
numero de parolas international in su vocabulario.
  Ora io opina que on pote dubitar le assumption que le mundo
necessita un sol lingua pro arrivar al pace. Io frequentemente leva le
question a esperantese, "Proque on non pote haber plure linguas auxiliar?"
Linguas auxiliar disveloppar se in situationes ubi il ha un necessitate
de illos.  Ben que il ha un certe logic que il esserea melior si tote
le mundo parlava le mesme lingua pro tote situationes de excambio
cultural, le realitate es que le currente luctas inter le varie
civilizationes del mundo, que ha existite desde seculos, va impedir
un preste attingimento de un accordo super un sol lingua pro tote
le mundo. In le interim nos pote usar linguas auxiliar in situationes
ubi le participantes beneficiar de illos pro rationes practic. E il
es possible pro plus que un lingua auxiliar a exister.  Sia realistic,
le anglese es le lingua auxiliar predominante hodie.  Mais isto non
implica que il ha necun beneficio in usar interlingua pro traductiones
scientific, in incontros inter svedese e italianos durante ferias,
mesmo pro studiar le philogia e etymologia in un maniera vivente,
como un lingua in le interrete inter angloparlantes e hispanoparlantes,
qui pote esser comprehendite melior per un lingua simple angloromance.
E on pote laborar pro facer le interlingua le lingua auxiliar official
del Union Europee.
del Union Europee o mesmo civilisation occidental.
  Le espernatese ha lor cultura, lor mundo, lor fide que impelle le
expansion de lor lingua.  Le fortias in isto me pare limitate, ben que
illes ancora succede, in despecto le limitationes de lor vocabulario
conglomerate e minus recognoscibile. Lassa illes prosequer lor objectos
e nos le nostre.

Stan Mulaik