Al lista INTERLNG,

Isto es un message importante pro tote interlinguaparlantes interessate
in participar in gruppos de novas (plus accuratemente, gruppos de
discussion) in Usenet.

In le gruppo news.admin.hierarchies on ha proponite un nove hierarchia
de gruppos international con un scopo europee. Le ration pro le
proposition es le manco de gruppos apte pro discuter cosas relevante a
Europa integre (e.g. le recente protestos contra le alte precios de
carburante) in un contexto international.

Le nomine del hierarchia probabilemente sera europa.* o europe.* (ubi le
"*" se substitue per le nomines del gruppos individual). Le propositor
original es Andy Roberts de Grande Britannia. Le hierarchia sera
linguisticamente neutral: on potera participar in le lingua de su
preferentia.

Le proposition initial contineva alcun suggestiones preliminar pro le
nomines del gruppos. Pro exprimer le neutralitate linguistic del
hierarchia, le nomines era construite de parolas arbitrarimente prendite
de varie linguas europee -- que io trovava inesthetic e inpractic.

Dunque, io inviava un responsa con un proposition de nomines prendite de
interlingua, proque interlingua es neutral e non-arbitrari. Iste idea
era generalmente approbate como un optime solution, malgrado que necuno
del participantes era familiar con interlingua. Le approbation era de
tal sorta que io nunc subito me trova esser un copropositor official del
hierarchia (!).

Si iste projecto sera successose, illo sera le sol hierarchia de gruppos
in existentia con un scopo integremente europee. Il se pare que
interlingua jocara un grande rolo in le denomination del gruppos, e
forsan etiam in le documentos official del hierarchia. Isto pote esser
un grande opportunitate pro le divulgation de interlingua.

Io invita omnes qui es interessate a sequer le discussion currente in
news.admin.hierachies e participar in illo. Vostre participation
adjutara a demonstrar le interesse in le hierarchia.

- Martijn