Le Union Danese pro Interlingua offere al interessatos apprender cata
die in le septimana que comprehende le Die de Interlingua (le 15 de
januario) dece parolas in interlingua. Le "ordgætteleg" (quiz de
parolas) se trova al sito del DIU http://www.interlingua.dk (preme "Prøv
ordgættelegen" - Essaya le quiz de parolas).

Le quiz es pro daneses, ma le DIU spera poter inspirar alteres. On vide
pro cata die un lista de parolas. Ante de premer le parola on debe
traducer lo. Pois on pote vider le traduction in danese e alcun exemplos
utile del uso del parola, p.ex. in phrases.

Le Die de Interlingua prende loco pro le octave vice iste anno. Omne
organisationes, representantes e membros de interlingua debe al mesme
die facer activitates pro interlingua. Le idea es que mesmo parve
initiativas - si il ha assatis de illos - deveni visibile, quando illos
es combinate con initiativas in altere regiones o paises. Que ha tu
preparate pro le Die de Interlingua in solmente 12 dies?

Pro inspiration: Contacta le medico o dentista e demanda permission de
poner materiales informative super interlingua in le sala a attender.
Contacta le bibliotheca local e demanda permission de placiar le prime
lection del curso postal (in octo lectiones) que pote esser requirite
gratuitemente ab le organisationes national de interlingua. Face un
discurso in un club del qual tu es membro. Arrangia un parve exposition
super interlingua in le local centro o domo cultural. Scribe un salute
in interlingua a un amico o trova nove contactos in Internet (p.ex. per
le pagina del UMI, http://www.interlingua.com).

E, naturalmente, informa super le initiativas per INTERLNG, per favor,
pro le inspiration de nos alteres.

Con mi optime salutes
Thomas Breinstrup