Car amicos,
In le message de John Brandell io ha legite que on prepara le "Strenamento"
de un Academia pro Interlingua. Io me frica le oculos vidente iste parola
"strenamento", un parola que io non cognosce e que, io crede, non pertine
al vocabulario de interlingua. Ma io suppone que le autor vole dicer
"fundation" o "creation".
Como prime carga del "Academia" John Brandell propone discussiones,
sequite de votationes, super diverse punctos que on jam ha discutite e
ancora discute in le listas INTERLNG, COOLLIST e IL_STRAT. Proque votar? De
tote lateres io audi le critos que il es un idea diabolic de prescriber un
certe uso de interlingua, nam, on dice, cata uno debe esser toto libere de
usar interlingua como ille lo vole. Alora votationes me pare incompatibile
con libertate. Cetero il es absolutemente inacceptabile que un parve gruppo
de personas, del quales nos non cognosce le competentias, qui se ha reunite
in le "Academia", poterea facer decisiones. Que poterea esser le valor de
tal votationes?
Le question de usar le orthographia etymologic o le orthographia phonetic
non deberea esser prescribite. Benque le orthographia etymologic es le plus
usate (e que personalmente io prefere), vos sape totes que il existe
diverse textos con orthographia phonetic, p.ex. un del cinque historias in
"Multo Secrete" que ha essite publicate per le UMI in le anno 1997 e que
vos ha legite sin dubita.
In facto le discussiones super le uso de interlingua concerne un MICRISSIME
numero de parolas: le parolas ""grammatic" latin. E nos vide que iste
numero ha diminuite in le curso del annos, nam in le IED on trova plures
inter illos que necuno usa, p.ex. "potius". Que on lassa a cata uno le
libertate de sequer su preferentias! Proque prescriber que on debe usar
"mais" e non "sed" o "ma"? Io ipse ha mi preferentias e io accepta le
preferentias de alteres, benque il es difficile pro me de digerer le parola
"ego" como pronomine. Io crede que il es mi sentimento linguistic que me
dice que iste parola ha supervivite in le linguas moderne solmente como
substantivo e in combinationes "egoismo, egoistic, egocentrismo", etc.
Il le message de Jay Bowks del 7 de martio Jay scribe que il non debe esser
un "discordo .... quanto al uso..... del formation de nove parolas". Ma un
discordo relative al formation de nove parolas non existe. Le regulas pro
le formation de nove parolas es describite clarmente in le introduction del
IED. Lo que nos debe facer es APPLICAR iste regulas. Naturalmente il pote
restar dubitas super casos isolate. Io opina que il es plus importante de
dedicar nostre tempore a iste application, que produce milles e milles de
parolas, que de querelar eternemente super un numero de 20 a 30 parolas
'grammatic" latin.
Mi opinion es que un Academia pro Interlingua con le cargas proponite per
John Brandell non es necessari. Discussiones super questiones linguistic
pote esser facite in le Coollist.
Salutes amical de Piet
http://www.homepages.hetnet.nl/~interlingua/frame/index.htm
|
