Car amicos,

Un del dictionarios multe importante de interlingua es le "Worterbuch
Deutsch-Interlingua" per Andre Schildt e Helmuth Ruhrig. In illo on trova
non solmente le vocabulos del I.E.D., ma anque numerose alteres. Io ha
constatate duo factos:
1. Sovente le "nove" parolas es parolas que le autores ha registrate applicante
le regulas date in le introduction del I.E.D.
2. In certe casos, que es assatis numerose, on pote haber su dubitas relative al
application correcte del regulas date in le introduction del I.E.D.
Io da hic alicun exemplos de mi dubitas. Esque le parolas que seque ha un
supporto sufficiente de al minus tres linguas fonte de interlingua? E si non,
esque il existe tamen rationes pro acceptar los in interlingua?

sich balgen = brigar
Balgerei = briga
Barmixer = barista
Bauernstand = paisaneria
Bauerntracht = costume villagese
baumeln = pendiliar
Baumgarten = fructeto
bedachen = tectar
Bedingtheit = conditionalismo
befiedern = (im)pennar
beflaggen = imbandierar
Beflaggung = imbandieramento
begeifern = imbavar
         e ancora alicun centenas.

Esque iste parolas, e multe alteres, es acceptabile in Interlingua? Il me
pare necessari que nos face un examine critic de iste grande obra del duo
interlinguistas eminente.
Qui es preste a facer con me iste labor in un maniera systematic? Isto
significa que primo nos face un inventario del parolas dubitose e que
secundo nos los discute pro determinar si nos debe acceptar o rejectar los.
Io es consciente del facto que lo que io propone hic non es un labor de
pauc horas. Il es mesmo probabile que le labor pote durar alicun menses e
forsan alicun annos.

Salutes amical de Piet Cleij