Le prime supercontinente: le hypothese ha essite formulate in function del analyses geologic del parte nord-occidental de America del nord.

In 1912, le meteorologo gemano Alfred Wegner proponeva le theoria del deriva del continentes. Un parte del fascino de iste theoria es derivate per le facto que le formas de Africa e de America latin sembla coincider perfectemente.
Prosequente in le labor de Wegener, ora un geologo del Universitate del Nord Carolina a Chapel Hill crede de haber discoperite un supercontinente nunc jam disparite; que ha essite baptisate Columbia. Secundo John J. W. Rogers, le continentes del mundo se ha unite e separate plure vices e Columbia ha existite plus que 1,5 milliardos de annos retro, antea del altere supercontinentes suggerite per le recercatores. Le nomine del supercontinente proveni per le facto que le probas de su existentia se trova in le region del fluvio Columbia, in le nord-west de America del nord. 
Secundo le theoria de Rogers, describite in le magazin "Gondwana Research", circa 1,8 milliardos de annos retro le continentes initiava collider se dante origine a un sol massa de terras emerse. Columbia initiava postea divider se circa 1,5 milliardos de annos retro e su fragmentos vagava super le superficie terrestre independentemente; usque a circa un milliardo de annos retro, quando illos se reuniva pro formar un nove supercontinente, baptisate Rodinia. Rodinia durava usque a circa 700 milliones de annos retro, ante de finder se in numerose fragmentos que, de novo, vagava independentemente usque a quando illos originava, circa 250 milliones de annos retro, a Pangea. Le ultime supercontinente habeva totevia vita breve e illo se fragmentava quasi immediatemente, dante origine a nostre continentes actual.

Luca Ghitti