E lo Ha Appellate Que?

Durante plus que duo seculos, le infantes american ha cantate iste canto:

Yankee Doodle vadeva al urbe, cavalcante sur un pony
Poneva un pluma in su cappello e lo appellava macaroni

[Yankee Doodle went to town, riding on a pony
Stuck a feather in his hat and called it macaroni]

Macaroni? Macaroni???!!! Misericordia, que significa ille parola? Si on pensa a
isto (e le majoritate del americanos non pensa a isto), on probabilemente veni al
decision que illo es un phrase absurde, usate solmente perque illo rima con
"pony." Ma in iste lineas le parola "macaroni" es in veritate multo significante —o
lo era in le seculo XVIII, como nos videra in un momento.

Ma antea nos examinara le parola "Yankee." Il ha parolas in anglese le quales ha
necun etymologia cognoscite; iste nomine ha plures. Alcun personas pensa que
illo es de origine nederlandese, alteres dice que illo es derivate de un parola de
un del linguas indian del familia algonquin, ma in mi opinion le explication le plus
credibile es que "Yankee" era le pronunciation de "English" usate per alcun
indianos. Qualcunque sia le origine, "Yankee" deveniva un nomine que se refere
al americanos del nord del SU in general o al residentes de Nove Anglaterra
("New England," le sex statos del plus extreme nord-est: Connecticut, Rhode
Island, Massachusetts, New Hampshire, Vermont, e Maine) in particular. In altere
paises que le SU, "Yankee" pote significar un americano in general, ma
personas statounitese (si illes non vole luctar!) nunquam appellarea un residente
del sud del SU un "Yankee."

E qui era Yankee Doodle? Ille era le colonista american como ille era viste per le
truppas britannic: un paisano ignorante e semi-civilizate. In le canto, que deride le
rebellos del colonias e primo era cantate per le britannos (comenciante in 1755)
iste quasi-barbaro cavalca a un del parve urbes american (sin poter imaginar le
cultura de un grande citate como London, le qual habeva approximatemente un
million de residentes a ille tempore, quando Nove York habeva 20 mille), pone un
pluma de un ave morte in su cappello, e pensa que ille es tanto sophisticate
como le plus cosmopolitan britannos del plus alte nivello social. In lor tempore
(mesmo como in le nostre) Italia era un centro international de cultura, elegantia,
e fashion, e dunque le club le plus fashionabile, in le qual solmente personas le
plus fashionable era clubistas, era appellate le "Macaroni Club." Si le canto se
habeva originate in nostre tempore, probabilemente illo terminarea con le
parolas "e lo appellava Armani."




Le canto deveniva popular e le rebellos del colonias adoptava le melodia ma
adaptava le parolas. In lor version, Yankee Doodle era suave, brave, capabile, e
popular inter le feminas. Ma ille version non surviva post le revolution; le infantes
del nove republica cantava le mesme canto que le britannos habeva cantate pro
derider le americanos, e le infantes american continuava cantar lo usque hodie.


Copyright 2000 per J J Dobkin.