Ecce le secunde parte del explication in re le Det "Cata, tote, omne"
In le introduction, io ha dicite que le Det face un selection e un
quantification in un classe de objectos.
Le Det "cata, tote, omne" selectionne tote le classe de objectos.
Nonobstante, cata uno lo face de un maniera differente.
Pro le explication, io va utilisar iste pictura hic infra, que es un
representation del classe "papagai", ubi cata "X" es un papagai :
[ X X X X X X X X ] le classe papagai
Io va commenciar per explicar le Det "tote", proque illo es,
semanticalmente, le Det basic, sur lequal es constuite "cata" e post
isto "omne".
A mi aviso, vos totes ha in vostre lingua maternal un morpheme que
representa "tote" e uno que representa "cata" (que illo sia per le medio
de un Det, o de un flexion). Ma "omne" poterea esser absente de un de
vostre lingua maternal.
1. Le Det TOTE
Le Det "tote" selectionne le classe de iste maniera :
[ X X X X X X X X X X X]
0-------- - - - - - - - - - - - ----->
Si "tote" poteva parlar, illo dicerea isto :
- io sape que il ha un classe de papagais,
- io lo visita,
- io reguarda le prime papagai, le secune papagai, le terti papagai,
etc,
- io face un conclusion in re iste classe. Per exemplo : "tote le
papagais parla".
Nunc, lo que es importante, es le specie de conclusion que "tote" pote
facer :
- UN TRACTO INHERENTE al objectos del classe (al papagais).
Tote le papagais parla. Tote le papagais ha plumas.
E ALORA : UN INFORMATION QUE POTEREA ESSER UNIVERSAL
Tote le papagais ha derecto al libertate de
lor opinion politic.
- UN INFORMATION SITUATIONAL SPECIFIC a un sub-classe de objectos
Tote mi papagais parla interlingua (le sub-classe es "mi
papagais")
- UN O PLURE EXCEPTIONES in le classe del objectos.
Tote le papagais parla, excepte le papagai de Allan, proque
ille non ha finite de apprender le flexion casual finese.
Le regula morphologic : Tote + le + N plural + V plural
(Nota bene : on pote utilisar Tote + le + N singular, como in "tote le
die esseva belle", "tote le camera es ben decorate". Illo significa que
on pote divider le unitate(die, camera) in plus parve unitates (periodes
de tempore, partes del camera) e iste sectiones son "visitate" per
"tote")
2. Le Det CATA
Le Det "cata" selectionne le classe de iste maniera :
[X X X X X X X X X X X]
0---/
/- - - - - - - - - - - -----/
/-------------------------------->
Si "cata" poteva parlar, illo dicerea :
- io sape con certitude que il ha un classe de papagais, proque io lo
jam cognosce,
- io retorna in le classe del papagais e visita lo,
- io reguarda le prime papagai, le secunde papagai, le tertie....
- io face un reporto :
Cata papagai qui parla le basco ha recipite un basio de Ignacio.
Le reporto que "cata" pote o non pote facer :
- NON UN TRACTO INHERENTE al objectos del classe, proque le classe es
jam ben cognoscite.
*Cata papagai parla (false)
Nonobstante, io pote ADDER UN INFORMATION IN RE UN TRACTO INHERENTE :
Cata papagai parla de su proprie maniera : le papagai de Paolo
face predicationes, e le papagai de Ove face supplicationes
(ille time que Ove ha un accidente con su velo in le nive)
Si io utilise "cata" pro un declaration universal, illo es un
declaration nove, un lege projectate in le futuro, e non un principio
jam considerate como universalmente recognoscite.(isto es le
consequentia del facto que on non pote utilisar "cata" pro un tracto
inherente, tunc, per extension, on non pote utilisar lo pro un principio
jam universalmente recognoscite, o considerate como universalmente
recognoscite)
Cata papagai ha derecto ha un salario juste pro le pagamento
de su discurso.
- UN O PLURE EXCEPTIONES in le classe de objectos
Cata papagai svedese ha recipite un diploma del universitate de
Ladonia, excepte le papagai de Janne e le de Sig (le papagai de
Janne ha troppo ridite al burlas del papagai de Sig)
Regula morphologic : cata + N singular + V singular
3. Le Det OMNE
Le Det "omne" selectionne le classe de iste maniera :
[X X X X X X X X X X X]
0---- - ----------------------->
Si "omne" poteva parlar, illo dicerea :
- Io sape que il ha un classe de papagais
- io visita lo,
- io reguarda UN SOL papagai,
- io considera iste papagai como le prototypo de tote le altere
papagais,
- io face un grande declaration universal
Omne papagai parla, sin distinction de racia, o de colore de
plumas.
Le declaration que "omne" pote o non pote facer :
UN TRACTO INHERENTE al objectos del classe
Omne papagai parla.
UN INFORMATION QUE SE PRESENTA COMO UNIVERSAL, que se considera como
universalmente recognoscite
Omne papagai ha derecto al respecto del Scala de Milano.
- NULLE EXCEPTION.
*Omne papagai parla, excepte lo de Ingvar, que plora sur
le computator (false... le phrase es false, non le historia
del papagai...)
Illo es le ration pro lequal on non pote dicer : *Deo es OMNIsciente,
excepte que illi non sape que...
Regula morphologic : Omne + N singular + V singular.
--------------------
Nunc le equivalentia con le francese, pro justificar mi correctiones in
re le Declaration universal :
INTERLINGUA FRANCESE
Tote le + N plural Tous + les + N plural
Tote le + N singular Tout + le,la + N singular
Cata + N singular chaque + N singular
Omne + N singular Tout + N singular
Evidentemente, isto esseva solmente regulas general, ma io spera que le
utilisation de "tote, cata, omne" essera plus facile nunc.
Linguisticamente,
Anne
--
Anne Bürgi
Courriel : [log in to unmask]
Adresse : 640, McGregor, app. 406. Sherbrooke, QC, Canada, J1L 1V7
téléphone : -- 819 573 0068
|