Si, Mario, "legiferar" es in le IED e es equivalente in
significantia al anglese "legislate" e le esp. legislar.
Secundo mi Dictionario Webster's de anglese, "legislate"
es un retroformation de "legislation" < lat. legis (=lege)
+ latio = (portar, -ferer [-fer-/-lat]).  Le IED ha
mesmo "legisfer- [-fer-/-lat-] mais non "legisferer".

Le verbo in latino ferre [fero/latum] es multo inusual
proque le forma supine non es similar al radice del verbo.

Ben que le verbo "ferre" non es per se in alcun lingua
moderne, illo existe como un suffixo verbal in
transferer, conferer, deferer, differer, inferer,
interferer, preferer, referer, transferer (>translation),
legisfer-.  Sub "referer" on ha "relation" basate super
le forma supin (un connexion io non ha vidite ante isto)
de "referer" [-fer-/-lat-].

Le forma supin es le forma del participio passato in le
latino, e es un del partes importante del verbo.  Illo
corresponde in interlingua al forma del participio passate
"irregular" de certe verbos in -er e -ir.  On adde le -e al
forma supin (p.e. in [-fer-/-lat-] le secunde forma es le
forma supin).  Assi on ha le infinitivo "referer" e su
participio passate de "relate".  Similarlmente il ha
"extraher" [-trah-/-tract-], extracte (part. pas.).
On adde le suffixo -ion al forma supin o le participio
passate post remover le -e a crear le substantivo, action
de < >ion.  Assi extraher, extracte, extraction;
referer, relate, relation.

Le mesme regula pro usar -ion applica a verbos regular:
constar, constate, constation.

On pote crear nove verbos per adder -ar al forma supin:
extraher > extracte > extractar
contraher > contracte > contractar > contractate > contractation
mais equalmente contraher > contracte > contraction.  O
"contraher" > contrahite > contrahition (rarmente usate).

Tote verbos in -ar ha regular participios passate.

Stan Mulaik